కీ.శే శ్రీగరిమెళ్ళబాలకృష్ణప్రసాద్ గురువుగారి సప్తసప్తతి (77వ) జయంతి పురస్కృత శ్రీతాళ్ళపాక అన్నమార్యుల సంకీర్తనాబృందగానం...

కీ.శే శ్రీగరిమెళ్ళబాలకృష్ణప్రసాద్ గురువుగారు, మాజి తిరుమల ఆస్థానగాయకులు, శ్రీవేంకటేశపదపాదారాధకులు, శ్రీతాళ్ళపాక అన్నమార్య హృదయావిష్కృత గోవిందతత్త్వారాధకులు,

అనగానే శ్రీతిరుమలేశుడిని కళ్ళెదుటసాక్షాత్కరింపజేసే శ్రీతాళ్ళపాక అన్నమాచార్యుల సంకీర్తనాసరములస్వరరాగరససుగంధజ్ఞ్యాపకాలలో ఓలలాడే విజ్ఞ్యులు ఎందరో...

అట్టి మహనీయుల సప్తసప్తతి (77వ) జయంతి పురస్కృత 

శ్రీతాళ్ళపాక అన్నమార్యుల సంకీర్తనాబృందగానం భక్తుల్లెలరికీ కర్ణామృత ప్రసాదమే కద... 

ప|| త్రికరణశుద్ధిగ జేసినపనులకు 

అనే మధురాతిమధురమైన సంకీర్తనలో, ఈ క్రింది విధంగా శ్రీహరినామ స్మరణం, మననం, గానం యొక్క వైభవాన్ని ఆచార్యులు ఎంతో రమ్యంగా స్తుతించారు.....

చ|| 

హరి యనురెండక్షరములు నుడివిన నఖిలవేదములు మంత్రములు

గరిమ ధర్మశాస్త్రపురాణాదులు క్రమమున జదివినపుణ్యములు 

పరమతపోయోగంబులు మొదలగుబహుసాధనములసారంబు 

పరిపక్వంబై ఫలియించగా బట్టబయలు వెదకనేలా

...

వంట అందరూ వండుతారు....

కాని సత్బ్రాహ్మణశ్రేణికి చెందిన అమృతమయమైన వంటకం కొందరికి మాత్రమే ఆ అన్నపూర్ణాదేవి యొక్క అనుగ్రహంగా అమరే వైభవం...

అవ్విధంగానే...

శ్రీహరి నామాన్ని ఎందరో భక్తులు నిత్యం నుడువుతూనే ఉంటారు....

కాని శ్రీతాళ్ళపాక అన్నమాచార్యుల హృదయం నుండి ఉప్పొంగిన స్వరగంగాలహరుల్లో మెరిసిన అమృతమయమైన రీతిలో శ్రీహరిస్తుతి గావించడం కొందరికి మాత్రమే శ్రీశారదాంబా అనుగ్రహంగా అమరే వైభవం...

పాలలో నీళ్ళు కలపడానికి మరియు నీళ్ళలో పాలు కలపడానికి.....ఉండే భేదంలా....

సాహిత్యంలో సంగీతాన్ని రంగరించడానికి మరియు

సంగీతంలో సాహిత్యాన్ని మేళవించడానికి గల భేదమే ఆనాటి పాతతరం యొక్క ఘనమైన సుసాహితీప్రధానసంగీతరవళికి మరియు ఈనాటి సంగీతప్రధానసాహితీఒరవడికి గల

వైవిధ్యం....

అందుకే అనాటి విజ్ఞ్యులు రచించి అందించిన ఆపాతమధురగానరసగుళికలు, అంతగా సంగీతస్పర్శలేని సమాన్యుల జీవితాల్లో కూడా నిత్యనూతనస్మృతికావ్యములై ఈనాటికీ మారుమ్రోగుతున్నాయి....

అందుకే 6 శతాబ్దాల క్రితం నాటి ఆపాతమధురశ్రీవేంకటహరిగుణగానరసగుళికలైన శ్రీతాళ్ళపాక అన్నమార్యుల అమరరచనార్ణవం ఈనాటికీ శ్రీహరిభక్తుల హృదయాంతరాలను భగవద్ భక్తిజ్ఞ్యానవైరాగ్య విభూతిపరిమళాలతో అనునిత్యం దేవతామయం గావిస్తూ ఆలపించిన, ఆలకించిన వారెల్లరినీ తరింపజేస్తున్నది....

అట్టి అత్యంత మహిమాన్వితమైన శ్రీ తాళ్ళపాక అన్నమాచార్యుల శ్రీవేంకటముద్రాంకిత

సంగీతసాహిత్యరచనార్ణవంలో, వారి జీవితపర్యంతమూ కూడా అగ్రశ్రేణి స్వరరాగతపస్సును ఆచరించిన మేటి మహానుభావులుగా, అభినవ అన్నమార్యులుగా, వినుతికెక్కిన శ్రీగరిమెళ్ళ బాలకృష్ణప్రసాద్ గురువుగారి జయంత్యుత్సవంలో పాల్గొని తరించడం, గోవిందుడి భక్తులెల్లరికీ లభించే సగౌరవసుస్వరరాగసంకీర్తనాసుధాసారాభిషేకోత్సవం...

అందునా "సంకీర్తన గోష్టి గానం" అంటే గోవిందుడికి ఎంతో ప్రీతిపాత్రమైన కైంకర్యం కాబట్టి, ఈ విశిష్టమైన సంగీతసాహిత్యాలాపనాక్రతువులో పాల్గొనే విజ్ఞ్యుల్లెలరికీ విశేషమైన శ్రీశ్రీనివాసుడి అనుగ్రహలబ్ధి సమకూరి తరించడం ఎల్లరి సౌభాగ్య హేతువు....

శ్రీవేంకటహరిసంకీర్తనావైభవం గురించి తెలియాలంటే,

శ్రియఃపతి యొక్క అమేయ వాత్సల్యాన్ని వర్షించే వైనాన్ని వివరించే గౌణములతో, విభూతులతో, యతిప్రాసాలంకరణౌచిత్యంతో, సకలజనస్మరణయోగ్యమైన స్వరసాహిత్యలాలిత్యంతో రంగరించబడిన లలితపదముల లావణ్యభరిత సంకీర్తన ఒకటి ఆలపించినా, ఆలకించినా విదితమౌను...

అట్టి ఒక మహత్వభరిత సంకీర్తన క్రింద పేర్కొనబడింది...

ఇట్టి విశిష్టమైన శ్రీహరిసంకీర్తనారాధనాకైంకర్యంలో పాల్గొని తాము తరించి, శ్రోతలను, భక్తులను, శిష్యులను, ఆరాధకులను, తరింపజేస్తున్న నిర్వాహకబృందసభ్యులకు, గాయకగాయనీమణులకు, వాద్యసహకార నిలయవిద్వాంసులకు, వ్యాఖ్యాతలకు మరియు ఆహ్వానిత ప్రముఖ వక్తలకు, విజ్ఞ్యులకు, విద్వాంసులకు, కళాకారులకు, మాన్యులకు, ఇతర మహానుభావులందరికీ కూడా సవినయ సుహృద్భావకారకశుభాభినందనానమస్సుమాంజలి....

ఎందరో మహానుభావులు...అందరికీ వందనములు...💐

***** ***** ***** ***** ***** ***** ***** *****

కలిగె మాకు నిది కైవల్యం

కలకాలము హరికథాశ్రవణం ॥పల్లవి॥

అచింత్య మద్భుత మానందం

ప్రచురం దివ్యం పావనం

సుచరిత్రం శ్రుతిశోభితం

అచలంబిదివో హరికీర్తనం ॥కలి॥

నిరతం నిత్యం నిఖిల శుభకరం

దురితం హరం భవదూరం

పరమ మంగళం భావాతీతం

కరివరదం నిజ కైంకర్యం ॥కలి॥

సులభం సుకరం శోకనాశనం

ఫలదం లలితం భయహరణం

కలితం శ్రీవేంకటపతిశరణం

జలజోదరనిచ్చ స్తోత్రం ॥కలి॥

https://www.telugubharati.com/kIrtanalu/annamayya/kirtana.php?id=976

***** ***** ***** ***** ***** ***** ***** *****

ఓం నమో వేంకటేశాయ...💐